ທ່ານຂາຍໄຂ່ຈາກໄກ່ທີ່ລ້ຽງຢູ່ເຮືອນ ຢູ່ ສປປ ລາວ ໄດ້ບໍ?

ວັນ-ເດືອນ-ປີ ນິຕິກໍາ: 24-07-2013 | ເຜີຍແຜ່ລົງຈົດໝາຍເຫດ: 09-12-2013 | ປະເພດນິຕິກໍາ: ກົດໝາຍ | ສະຖານະພາບ: ປັດຈຸບັນ

ທຸລະກິດອາຫານ ໝາຍເຖິງ ການດຳເນີນກິດຈະການໃດໜຶ່ງໃນການຜະລິດ, ການ ປຸງແຕ່ງ, ການຫຸ້ມຫໍ່, ການຕິດສະຫຼາກ, ການຈຳໜ່າຍ ແລະ ການບໍລິການ,

ຊຶ່ງບໍ່ລວມເອົາການຂາຍອາຫານແຄມທາງ, ການຂາຍອາຫານຕາມຕະຫຼາດ;

ກົດໝາຍສະບັບນີ້ ນຳໃຊ້ສຳລັບ ບຸກຄົນ, ນິຕິບຸກຄົນ ຫຼື ການຈັດຕັ້ງທັງພາຍໃນ ແລະ ຕ່າງປະເທດ ທີ່ເຄື່ອນໄຫວທຸລະກິດອາຫານ ແລະ ຜູ້ບໍລິໂພກ

ລວມທັງການຂາຍອາຫານແຄມທາງ ແລະ ໃນຕະຫຼາດ ຢູ່ ສປປ ລາວ ຍົກເວັ້ນການປຸງແຕ່ງ ອາຫານ ສຳລັບຄົວເຮືອນ.

ຜະລິດຕະພັນເບື້ອງຕົ້ນ ໝາຍເຖິງ ຜະລິດຕະພັນທີ່ເປັນວັດຖຸດິບທີ່ມາຈາກດິນ, ນ້ຳ ຫຼື ຜະລິດຕະພັນທີ່ມາຈາກການປູກ, ການລ້ຽງ ແລະ ການປະມົງ

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງດຳເນີນທຸລະກິດອາຫານ ຕ້ອງປະກອບເອກະສານ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍ

ການສົ່ງເສີມການລົງທຶນ ແລະ ກົດໝາຍວ່າດ້ວຍ ວິສາຫະກິດ ເພື່ອໃຫ້ຂະແໜງການອຸດສາຫະກຳ ແລະ ການຄ້າ ພິຈາລະນາ

ພາຍຫຼັງໄດ້ຮັບ ການເຫັນດີທາງດ້ານວິຊາການຈາກຂະແໜງການສາທາລະນະສຸກ ໂດຍປະສານສົມທົບກັບຂະແໜງການອື່ນທີ່ກ່ຽວຂ້ອງ

ຍົກເວັ້ນທຸລະກິດ ກ່ຽວກັບການຜະລິດເບື້ອງຕົ້ນ.

ຫ້າມຜູ້ດຳເນີນທຸລະກິດອາຫານ ມີ ພຶດຕິກຳ ດັ່ງນີ້:

ດຳເນີນທຸລະກິດອາຫານ ໂດຍບໍ່ໄດ້ຮັບການອະນຸຍາດຈາກຂະແໜງການສາທາ ລະນະສຸກ ແລະ ຂະແໜງການທີ່ກ່ຽວຂ້ອງ;

ຜະລິດຕະພັນອາຫານ ກ່ອນຈຳໜ່າຍ, ສົ່ງອອກ, ນຳເຂົ້າ, ບໍລິການ ແລະ ບໍລິຈາກ ຕ້ອງໄດ້ຜ່ານການກວດກາ ແລະ ຢັ້ງຢືນຄຸນນະພາບຈາກກະຊວງສາທາລະນະສຸກ.

ເງື່ອນໄຂ, ຂັ້ນຕອນ ແລະ ປະເພດອາຫານທີ່ຈຳເປັນຕ້ອງຢັ້ງຢືນ ໄດ້ກຳນົດໄວ້ໃນລະບຽບ ການສະເພາະ.

ອາຫານທີ່ຈໍລະຈອນ, ຈຳໜ່າຍ, ຂາຍ, ບໍລິການ, ສົ່ງອອກ, ນຳເຂົ້າ ແລະ ບໍລິຈາກໃນ ສປປ ລາວ ຕ້ອງມີສະຫຼາກເປັນພາສາລາວ ແລະ/ຫຼື ພາສາສາກົນ

ທີ່ບົ່ງບອກຂໍ້ມູນລະອຽດ ກ່ຽວກັບອາຫານຢ່າງຖືກຕ້ອງ ຊຶ່ງໄດ້ກຳນົດໄວ້ໃນລະບຽບການສະເພາະ.

ພາຊະນະບັນຈຸອາຫານ ຕ້ອງໃຫ້ມີຄຸນນະພາບ ແລະ ຄວາມປອດໄພ,

ບໍ່ເຮັດໃຫ້ອາຫານເສື່ອມຄຸນ, ມີສານປົນເປື້ອນ ແລະ ນຳໃຊ້ສະເພາະອາຫານແຕ່ລະຊະນິດເທົ່ານັ້ນ.

ຜະລິດ, ຂາຍ, ບັນຈຸ ຫຼື ເກັບຮັກສາອາຫານໃນພາຊະນະບັນຈຸທີ່ເປັນອັນຕະລາຍຕໍ່ ຜູ້ບໍລິໂພກ;

ນຳໃຊ້ວັດສະດຸທີ່ເປັນພິດ, ເປິເປື້ອນ ຫຼື ບໍ່ເໝາະສົມໃນການຫຸ້ມຫໍ່ອາຫານ

ເຊັ່ນ ໜັງສືພິມ, ເຈັ້ຍທີ່ພິມແລ້ວ, ຖົງຝຸ່ນ, ຖົງອາຫານສັດ, ຖົງຊີມັງ ແລະ ວັດສະດຸອື່ນ;

ຕ້ອງເກັບຮັກສາຕາມເງື່ອນໄຂສະເພາະຂອງອາຫານແຕ່ລະຊະນິດ ແລະ ປະຕິບັດຕາມຫຼັກການການເກັບຮັກສາທີ່ດີ ເພື່ອຮັບປະກັນຄວາມປອດໄພອາຫານ.

ຜູ້ຂາຍອາຫານຢູ່ແຄມທາງ ຕ້ອງປະຕິບັດຕາມຫຼັກການ ການອະນາໄມທີ່ດີໃນການປຸງແຕ່ງ, ຂາຍ ແລະ ບໍລິການອາຫານ ຕາມທີ່ໄດ້ກຳນົດໄວ້ໃນລະບຽບການສະເພາະ.

ການຜະລິດອາຫານ ແມ່ນ ການນຳເອົາວັດຖຸ ຫຼື ສານໃດໜຶ່ງ ມາກະກຽມ, ປຸງແຕ່ງ ຜະລິດເປັນອາຫານດ້ວຍກຳມະວິທີຕ່າງໆ ລວມທັງການປູກ, ການລ້ຽງ.

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ໄດ້ຮັບອະນຸຍາດສ້າງຕັ້ງແລ້ວ ຈະດຳເນີນການຜະລິດ, ຈຳໜ່າຍ, ສົ່ງອອກ, ນຳເຂົ້າ

ໄດ້ກໍຕໍ່ເມື່ອໄດ້ຂຶ້ນທະບຽນຜະລິດຕະພັນອາຫານຢູ່ຂະແໜງການສາທາ ລະນະສຸກທີ່ກ່ຽວຂ້ອງ.

ສຳລັບບັນຊີຜະລິດຕະພັນອາຫານ, ຂັ້ນຕອນ ແລະ ເງື່ອນໄຂ ໃນການຂຶ້ນທະບຽນ ໄດ້ກຳ ນົດໄວ້ໃນລະບຽບການສະເພາະ.

ການແປຮູບຜະລິດຕະພັນສັດຂັ້ນຕົ້ນ ແມ່ນ ຂະບວນການປ່ຽນຮູບຜົນຜະລິດຈາກສັດໃຫ້ກາຍເປັນວັດຖຸດິບເພື່ອນຳໄປປຸງແຕ່ງເປັນອາຫານຂອງຄົນ ຫຼື ສັດ

ລວມທັງການເກັບຮັກສາໄຂ່ ແລະ ນ້ຳນົມສົດ.

ການແປຮູບຜະລິດຕະພັນສັດຂັ້ນຕົ້ນ ເພື່ອຈຳໜ່າຍ ຕ້ອງດຳເນີນຢູ່ສະຖານທີ່ທີ່ໄດ້ຮັບອະນຸຍາດຢ່າງຖືກຕ້ອງ

ແລະ ຕ້ອງຢູ່ພາຍໃຕ້ການຄຸ້ມຄອງຂອງອົງການຄຸ້ມຄອງວຽກງານລ້ຽງສັດ ແລະ ສັດຕະວະແພດ.

ການເກັບຮັກສາ, ຫຸ້ມຫໍ່ ແລະ ການຂົນສົ່ງຜະລິດຕະພັນສັດຂັ້ນຕົ້ນ ຕ້ອງປະຕິບັດຕາມມາດຕະຖານເຕັກນິກ

ແລະ ລະບຽບການທີ່ ກະຊວງກະສິກຳ ແລະ ປ່າໄມ້ ກຳນົດ.